高雄市立正興國中國文領域

 露褲才也           正興國中  王淑姝

來來來！大家來坐乎好！聽我蘇仔來講古。講啥麼古？講阮迄個「頂港有名聲，下港上出名」的「露褲才也」予你聽！

阮即個才也，雖然講名內抵有一字才字，不拘人煞無才無才。穿插露披露披，褲穿乎露露露，不時著看伊走予訓導ㄟ逐。講著伊，阮老ㄟ的臉著烏一半，手著捶心肝。毋管佗一位老師著上課，伊著有法度給汝睏，所以嘛有人叫伊愛睏才也。若是上國文仙ㄟ的課，伊一定睏甲綿綿綿。國文仙ㄟ講話輕聲細說，吟詩著親像咧唱歌。「月落烏啼霜滿天，江楓漁火對愁眠，姑蘇城外寒山寺，夜半鐘聲到客船。」汝若彎(uat⁸)頭，著看著才也伊咧釣魚，而且閣是釣著大隻魚，一粒頭佇遐哢蕩晃。英文老師的大喉嚨坑是通人知，上課從來著毋免用麥克風(mai³ ku³)。伊佇台仔頂講卡嘴角全全沫，才也是睏甲喙瀾khoo³  khoo³ ko ⁵。講著數學課赫著足恐怖。數學老師不時嘛講「小漢若無熨，大漢著未屈」。伊教冊介嚴格，阮上伊的課攏碼毋敢假肖；一個不拄好，咻！粉筆頭著飛過來！多恐怖？遮恐怖！這咧時陣，才也著不敢釣魚，不拘伊嘛有法度手拄嘴皮，目睭甦微啊甦微啊睏。反正不管啥麼時陣看著伊，伊攏咧睏。因為伊，阮全班上課精神攏真好，誰若愛睏，一看著才也咧盹痀著愛笑，一笑著清醒啊。

可能是上課睏飽啊，下課迷人的鐘聲若響，哦，迄著不得了啊！才也的目睭隨peh⁴金，兩粒目睭仁干那福眼遐邇大。汝看！即個褲露露的才也，佇遐十八般武藝盡展。汝看伊閣佇遐咧學金門王「大家來作伙，燒酒飲一杯。乎乾啦，乎乾啦。」紲落來閣搬布袋戲，「轟動武林，驚動萬教的鬼王」。不爾按那，伊是無禁無忌，食百二。「我身騎白馬過三關」，開始唱歌仔戲。歌仔戲唱煞，換做師公，「汝公也卜死有交代，鳳梨西瓜拿來拜ㄡ」。看伊迄個板(ban⁷)勢，真正是「十二月屎桶─盡拚」。若那上課，露褲才也，閣無電了。

只有一節課才也是清醒的，在座各位啊！請汝們臆看麥(mai⁷)。對！規叢好好，不錯！巷仔內ㄟ哦！著是體育課。若上體育課，才也著親像一尾活龍，活跳跳。看汝是欲走200抑是拺(sak⁸)鉛球，攏看伊一個人佇遐風神。頂襬校慶運動會，才也走最後一棒，原本阮即班是走第三卜拚第二，無想著伊走咧走咧，褲煞落了來。才也繼續走，一手lang¹褲一手舉(gia⁵)棒，會死命走，看伊遐拚勢，阮大家佇邊仔給伊拍拍仔兼喊呼，想不著伊真正拚著第一名。現在想起來，才也會走赫緊，一定是驚褲落下去，露褲才也變脫褲才也，予人看了了。

人講「有山便有水，有神便有鬼」。才也雖然普通時啊上課無認真，功課嘛無多好，不拘伊真趣味，做人嘛真好，不時著bing³ 猴lang⁷，與阮大家笑甲腹腸子打結，伊是班上的糖霜丸。「露褲才也真厲害，講著讀冊頭著晃，唱歌跳舞gik⁴詼諧，大家看甲笑呵呵。」這著是阮的露褲才也。我的講古到遮，煞！多謝大家的捧場。