我是一個志工   正興國中吳裕中

頂學期卜結束的時陣,學校宣布講,三年的畢業了後,他們的教室放空城,四周圍的盆栽沒人照顧,所以欲徵求植(sit8)栽的義工,負責佇歇熱的即段時間,照顧遐爾植物。我一聽得著緊去訓導處報名。同學看我走遐緊,攏笑我食飽換枵,力枷。其實自去年開始,我著是植栽志工,毋拘當初時我是予人掠雞拄鴨。因為歇熱的時陣逐班的盆栽要派一個人照顧。老師問講當有人欲來?問規埔攏無人,到尾著抽khau仔。算我衰,去抽著籤王。著安爾,我逐天去學校,給遮爾的樹仔佮花沃水、挽草仔。一日兩日了後,慢慢啊我發覺著做義工其實嘛袂歹。參加義工,對我來講原本是無牛駛馬,想袂夠終其尾煞做出興趣。

想當初,一歇熱,我有放幾天啊假,所以我去沃花的時陣,發覺遐邇花攏已經蔫蔫脯脯,甘那將欲翹去。我想講害啊,毋通無顧著花煞將花凋(ta)死,我逐佮沃足濟足濟水,希望他會當活過來。下埔我過去給看,竟然發現講逐叢都足有精神的。我看了足歡喜矣,著足榾力沃水矣。過無幾天,煞發現著我的植物哪會開始閣枯黃(ta bue2)枯黃,我逐日沃水啊?若會安爾?我趕緊去問阮校工張哥,伊是阮學校的植物博士。原來是我驚花會凋去,拚命沃水,沃一下尚澹,根去乎爛去。聽伊解釋,我才知影沃花毋是愈澹愈好。花嘛有花性,愛照起工來,水分愛拄拄好。

    我逐日去沃花,慢慢啊對遮爾花有感情,一日無沃,過轉日我一透早著緊去看因,驚因閣有什麼變化。下課了後,我嘛會去巡巡看看咧,給因整理整理。著因為我用心對待,所以遐邇盆栽攏嗎活甲真好,花開甲ua3嫷矣。我定定趁整理盆栽的時陣,將即寡無爽快的代誌講與因聽,親講看電視看太晚與媽媽唸啦、考試考無好啦、佮同學冤架啦、與老師罵啦;嘴裡唸唸、罵罵啊,心情閣哇輕鬆矣。

    毋止安爾,做義工的經驗嘛予我了解足濟人生的道理。比如講汝若無用心照顧,花伊著開袂嫷,人生嘛是安爾。「榾力食栗,貧澹吞瀾」,汝若無好好用心去過日子,是免按算有好將來。但是嘛袂當打拚閣無暝無日尚超過,安若無,顛倒食肥走瘦。親像水沃尚濟,花根煞爛爛去同款。自從我升起來三年仔,因為功課蓋濟,有的同學著會拚暝車,毋拘我從來著毋捌安爾。因為我知影安爾做是「洘埤(kho2 pi)掠魚」,無爾成績無進步,卻會將身體拍歹去。雖然講遮爾道理厝裡序大閣學校老師攏定咧講,毋拘講作伊咧講,一直無甲信斗,放佇心肝底。一直到做義工了後,我才會當了解。所以迄擺的經驗,與我體會著,做義工毋爾是咧佮學校鬥參共,嗎是幫助著我家己。所以即擺一聽得學校欲義工我著走第一。做義工實在是有好無歹。莫怪咱阿扁仔總統會介2001年定作國際義工年。

    佇遮閣大家分享我淡薄感想。想欲與大家了解做義工是一件快樂的代誌。即碼的社會講現實,「刣頭生理有人做,了錢生理無人做」,「電算機吊佇頷頸」,算甲清清楚楚。做義工,無錢領閣無彩工,著無咧頭殼壞去,遐邇無精光。著親像我當初嘛是「頷頸生瘤─佇著」,閣與阮遐邇同學佇遐拍lang3 liau5。其實安爾想是毋對矣。著是因為即碼的社會,逐家攏「伊無踏我的跤,我無咬伊的頭」,互相無交叉,遮爾遐爾孤khut8(冷酷)想講「別人的囝死袂了」。其實予社會即寡關心、做一個家婆,阮即個社會著會閣赫好。改變別人卡麻煩,所以逶咱家己做起。向望大家會當予別人一個機會,嘛予家己一個機會。予咱牽手鬥陣行,做一個快樂的義工。   

創作者介紹

高雄市立正興國中國文領域

sherry88825 發表在 痞客邦 留言(0) 人氣()